Cuireann an Idirbhliain i gColáiste Chroí Mhuire réimse leathan de chúrsaí éagsúla agus tarraingteacha ar fáil a ligeann do dhaltaí rud éigin nua a thriail, a gcuid scileanna agus spéiseanna a fhorbairt, muinín a chothú agus scileanna fíorshaoil a fhoghlaim. Seo roinnt samplaí den obair atá ar bun:
An Seomra Ranga Lasmuigh
Tá ár scoil suite san áit a mbuaileann Abhainn Bholuisce leis an bhfarraige, agus tá an t-ádh linn go bhfuil an cladach creagach agus an abhainn againn mar sheomra ranga lasmuigh.
I mBealtaine na bliana seo caite, rinneamar Seachtain na Bithéagsúlachta a cheiliúradh nuair a tháinig Éanna Ó hAoláin ó Chlár Uisce na nÚdarás Áitiúil ar cuairt chuig rang na hIdirbhliana. Fuair muid amach go bhfuil bithéagsúlacht den scoth in Abhainn Bholuisce!
I mbliana, tá daltaí na hIdirbhliana ag déanamh monatóireachta agus anailíse ar cháilíocht an uisce mar chuid de chomórtas SciFest, agus iad ag fiosrú na bithéagsúlachta ar an gcósta.
Comórtas SciFest
Ligeann SciFest do dhaltaí a scileanna eolaíochta a fhorbairt trí bheith ag obair i ngrúpaí agus trí thurgnaimh a dhéanamh. Roghnaíonn na daltaí tionscadal, bailíonn siad sonraí agus cruthaíonn siad póstaer faoin obair.
Reáchtáiltear an comórtas i mí na Bealtaine, agus tugtar deis do na daltaí a gcuid taighde a chur i láthair le linn na tréimhse sin. Tugann an taispeántas seo aiseolas do na daltaí chun go mbeidh siad in ann a dturgnaimh a fheabhsú agus níos mó taithí a fháil ar an saol eolaíochta.
Cúrsa Fiontraíochta
Is cúrsa é an cúrsa fiontraíochta a chabhraíonn le daltaí a bheith cruthaitheach agus scileanna gnó a fhoghlaim. Maireann an cúrsa ar feadh cúpla mí.
Déanann na daltaí plean dá dtáirge, cruthaíonn siad fréamhshamhail agus ansin díolann siad an táirge críochnaithe. Ag deireadh an chúrsa, cuireann siad a gcuid táirgí i láthair i gcomórtas a bhíonn eagraithe ag Údarás na Gaeltachta le tacaíocht ó Junior Achievement Ireland.
Is bealach iontach é an cúrsa seo chun scileanna tábhachtacha a fhoghlaim mar ullmhúchán don fhíorshaol.
Samplaí
Frámaí
Ba é an aidhm a bhí leis an táirge seo ná léiriú a thabhairt ar ár dtimpeallacht agus ár gcósta álainn anseo sa Spidéal.
Sa táirge seo ceanglaítear an dúlra le hócáidí lúcháireacha. Úsáidtear sliogáin chun cruthanna éagsúla a dhéanamh ar nós croíthe, tonnta agus eireabaill éisc, agus cuirtear frámaí orthu.
Tá dathanna éagsúla cúlra orthu ag brath ar an ócáid, mar shampla, gorm don Nollaig, bándearg do Lá Fhéile Vailintín agus bán, atá neodrach. Glacfar le horduithe pearsanta freisin.
Dialann Duitse
Mar chuid den tionscadal seo, dhear na daltaí dialann speisialta atá lán le smaointeoireacht agus le cruthaitheacht.
Tá an dialann bunaithe ar an bhfocal “Bláthaigh”, a chiallaíonn fás sa nádúr, ach tagraíonn sé freisin don rath a thagann ar dhuine ina shaol. Is léir go bhfuil an dá bhrí sin fite fuaite ina chéile tríd an leabhar ar fad.
Gach seachtain, déantar tagairt do phlandaí éagsúla atá le fáil go háitiúil, mar aon le seanfhocal nó ráiteas inspioráideach as Gaeilge.
Tá leathanaigh ar leith ann chun buiséadú, chun bia a phleanáil agus chun gníomhaíochtaí laethúla a chlárú a chothaíonn dea-shláinte, idir mheabhairshláinte agus shláinte fhisiciúil.
Cúrsa Ailtireachta
Glacann daltaí na hIdirbhliana páirt i gCeardlann Ailtireachta, atá curtha ar fáil ag Foras Ailtireachta na hÉireann. Tagann ailtire ar cuairt chuig an scoil chun obair a dhéanamh leis na daltaí agus chun treoir agus tacaíocht a thabhairt dóibh ina gcuid oibre.
‘Oidhreacht na Todhchaí’ atá mar théama i mbliana, agus tá na daltaí ag déanamh an tionscadail i gcomhthéacs a gceantair áitiúil.
Tá siad ag dearadh spáis don cheantar agus iad ag úsáid prionsabal inbhuanaithe. Nuair a bhíonn gach grúpa tar éis a ndearadh a aontú, cruthaíonn na daltaí macasamhail dá gcoincheap.
Is tionscadal é seo a fhorbraíonn tuiscint i measc na ndaltaí ar an timpeallacht mórthimpeall orthu agus ar na féidearthachtaí atá le dearadh éifeachtach chun cur leis an saol. Tugann sé taithí dóibh ar phróisis, ar mhodhanna agus ar theicnící nua, agus forbraíonn sé smaointeoireacht chriticiúil, shamhlaíoch agus nuálaíoch.
Gaisce: Gradam an Uachtaráin
Is clár náisiúnta é Gaisce:Gradam an Uachtaráin atá dírithe ar ógánaigh in Éirinn atá idir 14 agus 25 bliana d’aois.
Is clár forbartha pearsanta é a spreagann daoine óga chun a n-acmhainneacht iomlán a bhaint amach trí dhúshláin fhéinstiúrtha agus neamhiomaíocha.
Leagann rannpháirtithe spriocanna síos i réimsí na rannpháirtíochta pobail, scileanna pearsanta agus gníomhaíochta coirp, chomh maith le turas eachtraíochta a chur i gcrích.
Cuidíonn an clár le muinín, seasmhacht, folláine agus réimse leathan scileanna praiticiúla saoil a fhorbairt. Tá ardmheas i measc fostóirí agus institiúidí oideachais ar an ngradam seo.
Bíonn deis ag daltaí na hIdirbhliana sa scoil páirt a ghlacadh i Gaisce ag leibhéal an chré-umha.
Iriseoirí an Lae Amárach
Is cúrsa iriseoireachta dhá lá é an cúrsa seo a eagraíonn COGG i gcomhar le TG4 agus Ollscoil na Gaillimhe. Tá an cúrsa dírithe ar dhaltaí Idirbhliana ó scoileanna Gaeltachta agus Gaelcholáistí faid fad na hÉireann.
Bíonn dhá lá i gceist: ceardlann fhíorúil lae ar líne áit a roinneann saineolaithe a gcuid eolais maidir le bréagnuacht, cruinneas, scéalta maithe nuachta chomh maith le scileanna agallaimh.
Bíonn ceardlann phraiticiúil ar siúl freisin le go mbeidh deis ag na daltaí a gcuid cruthaitheachta agus scileanna a úsáid agus iad ag oibriú ar mhíreanna nuachta lena gcomhscoláirí.
